O modelo 303 é o documento oficial empregado para declarar o IVE repercutido (cobrado aos clientes) e soportado (pagado en compras e gastos) durante un período determinado. O seu obxectivo é calcular a diferenza entre ámbolos dous e determinar a situación fiscal do contribuínte fronte á Axencia Tributaria.
O cálculo realízase do seguinte modo:
- Súmanse tódalas facturas emitidas con IVE (IVE repercutido), aplicando os diferentes tipos vixentes en España (xeral do 21%, reducido do 10% e superreducido do 4%).
- Súmanse tódalas facturas recibidas con IVE pagado en compras e gastos (IVA soportado deducible).
- Réstaselle o IVE soportado ao IVE repercutido:
- Se o resultado é positivo, débeselle ingresar a cantidade a Facenda.
- Se o resultado é negativo, pódese compensar en períodos seguintes ou solicitar a devolución na última declaración do ano.
O modelo 303 deben presentalo obrigatoriamente:
- Autónomos e empresas que realicen actividades suxeitas a IVE.
- Profesionais e empresarios que emitan facturas con IVE (agás casos de exención).
- Entidades sen ánimo de lucro e outras organizacións que realicen actividades económicas suxeitas a IVE.
- Contribuíntes inscritos no Rexistro de devolución mensual do IVE (REDEME).
- Empresas que realicen adquisicións intracomunitarias de bens ou servizos.
A periodicidade de presentación varía segundo o tipo de contribuínte:
- Presentación trimestral (réxime xeral): a maioría de contribuíntes presentan o modelo con esta periodicidade, dentro dos seguintes prazos:
- Primeiro trimestre (xaneiro-marzo): 1-20 de abril.
- Segundo trimestre (abril-xuño): 1-20 de xullo.
- Terceiro trimestre (xullo-setembro): 1-20 de outubro.
- Cuarto trimestre (outubro-decembro): 1-30 de xaneiro.
- Presentación mensual: obrigatoria para empresas inscritas no REDEME ou cunha facturación superior aos 6 millóns de euros anuais. Nestes casos, o prazo é do 1 ao 30 do mes seguinte ao período declarado (agás o período de decembro, cuxa presentación finaliza o 30 de xaneiro).
É importante salientar que é obrigatorio presentar o modelo 303 mesmo se non se tivo actividade no período correspondente, en cuxo caso debe presentarse a declaración con resultado "sen actividade". A non presentación ou a presentación fóra de prazo pode supoñer sancións económicas que van dende recargas por presentación extemporánea (se non media requirimento) ata multas fixas ou proporcionais segundo a gravidade da infracción.
A presentación realízase telematicamente a través da sede electrónica da Axencia Tributaria, mediante certificado electrónico, Cl@ve PIN ou número de referencia. Este modelo adaptouse en diversas ocasións para cumprir coas normativas europeas e para facilitar a loita contra a fraude fiscal.
